మహిళలకు ఏ ఆపద వచ్చినా మహిళామిత్రలు వారికి అండగా మేమున్నామని భరోసా కల్పించాలని డిజిపి శ్రీ గౌతమ్ సవాంగ్  గారు ఆకాక్షించారు. కృష్ణాజిల్లా మచిలీపట్నంలోని రామరాజు ఫంక్షన్‌హాలులో నిర్వహించిన మహిళామిత్ర కార్యక్రమానికి డిజిపి ముఖ్య అతిధిగా హాజరయ్యారు. ఈ సందర్భంగా ఆయన మాట్లాడుతూ విజయవాడలో తొలిసారిగా ప్రారంభించిన మహిళామిత్ర కార్యక్రమం ఎంతో విజయం సాధించిందన్నారు. మహిళలు, బాలికలుపై ఏ విధమైన దాడులు, అత్యాచారాలు, వేధింపులు జరుగకుండా చూడాలని, అటువంటి ఘటనలకు పాల్పడే వారిని కఠినంగా శిక్షించాలని ముఖ్యమంత్రి శ్రీ వైఎస్‌ జగన్మోహన్‌ రెడ్డి గారు స్పష్టమైన ఆదేశాలు జారీ చేసారని తెలిపారు.

    అందుకు అనుగుణంగానే మహిళామిత్ర, సైబర్‌మిత్రలను రాష్ట్రవ్యాప్తంగా అమలుపరుస్తున్నామన్నారు. మహిళలు, బాలికలు తమ సమస్యలను ఏ సంకోచం లేకుండా ఈ బృందాల ద్వారా తెలియజేసుకొని తగు పరిష్కారం, రక్షణ పొందవచ్చన్నారు. పోలీసులకు బాధిత మహిళలకు మధ్య ఈ బృందాలు వారధిలా పనిచేస్తాయన్నారు. కొన్ని సందర్భాలలో మహిళా సమస్యల పరిష్కారంలో పోలీసులకు కొన్ని ఇబ్బందులు తలెత్తే పరిస్థితులు వుంటాయని, మహిళామిత్ర, సైబర్‌మిత్రల ద్వారా వాటికి తావు లేకుండా పటిష్టమైన, పరిపూర్ణమైన భద్రత లభిస్తుందన్నారు.

    ప్రస్తుతం అమలు చేస్తున్న స్పందనలో 52 శాతం మహిళా ఫిర్యాదులే వుంటున్నాయన్నారు. అందుచేత ప్రతి పోలీస్‌ స్టేషన్‌ పరిదిలో పది నుండి పదిహేను మహిళామిత్ర బృందాలు వుండేటట్లు చర్యలు చేపడుతున్నామన్నారు. ఏలూరు రేంజ్‌ డీఐజీ ఏఎస్‌ ఖాన్‌, జేసీ డా. కె. మాధవీలత, జిల్లా ఎస్పీ రవీంద్రనాథ్‌, ఏఎస్పీ సరిత, బొల్లినేని కీర్తి తదితరులు మహిళా బృందాలను ఉద్ధేశించి ఉపన్యసించారు. ఈ సందర్భంగా ప్రదర్శించిన కర్రసాము, బుర్రకథ వంటి సాంస్కృతిక కార్యక్రమాలు ఆహుతులను అలరించాయి. డీఐజీ పాలరాజు, కేఆర్‌యు వైస్‌ ఛాన్సలర్‌ సుందర కృష్ణ, డీఈవో రాజ్యలక్షి, జిల్లా వ్యాప్తంగా డీఎస్పీలు, సీఐలు ఇతర అధికారులు, సిబ్బంది పాల్గొన్నారు.