అనంతపురం జిల్లా చిలమత్తూరు పోలీసులు మరోసారి మంచి సేవలందించారు.  నిండు గర్భిణీ అని చూడకుండా భర్త చితక్కొట్టగా నిస్సహాయ స్థితిలో ఉన్న భార్యను తక్షణమే ఆసుపత్రికి పోలీసు వాహనంలో తీసికెళ్లి వైద్య సేవలు అందించారు. ప్రస్తుతం ఆ గర్భిణీ అనంతపురం సర్వజన ఆసుపత్రిలో చికిత్స పొందుతోంది. వివరాలు... చిలమత్తూరు మండలం చాగలేరు పంచాయతీ  పరిధిలోని పోతులప్పపల్లికి చెందిన 8 నెలల గర్భిణీ అయిన భారతిపై ఆమె భర్త శుక్రవారం రాత్రి దాడి చేశాడు. మద్యం సేవించి విచక్షణారహితంగా కడుపు పై కొట్టగా ఆమె వాంతులు చేసుకొని ఆరోగ్య పరిస్థితి సీరియస్ అయ్యింది.  ఆ గ్రామస్తుడు ఈ విషయాన్ని చిలమత్తూరు ఎస్ . ఐ సెల్ ఫోన్ కు సమాచారం అందించారు. మారుమూల పల్లె కావడం... వాహన సౌకర్యం లేకపోవడంతో చిలమత్తూరు ఎస్ ఐ వెంకటేశ్వర్లు, హెడ్ కానిస్టేబుల్ శంకరయ్య, కానిస్టేబుల్ మంజునాథ్ లు హుటాహుటిన పోలీసు వాహనంలో ఆ గ్రామానికి వెళ్లారు. గర్భిణీని వెంటనే పోలీసు వాహనంలో బాగేపల్లి ప్రభుత్వ ఆసుపత్రి కి చికిత్స నిమిత్తం తీసుకెళ్లారు. మెరుగైన చికిత్స కోసం అక్కడీ నుండీ హిందూపురం... ఆ తర్వాత అనంతపురం సర్వజన ఆసుపత్రికి తరలించారు. ప్రస్తుతం ఆ గర్భిణీ చికిత్స పొందుతోంది. గర్భిణీని తక్షణమే ఆసుపత్రికి పోలీసు వాహనంలో తీసికెళ్లి వైద్య సేవలందించిన చిలమత్తూరు ఎస్ ఐ వెంకటేశ్వర్లు బృందాన్ని జిల్లా ఎస్పీ భూసారపు సత్య ఏసుబాబు అభినందించారు.